Hala Kuo Papa

Ne u nofo pe 'i he Hauhau-'o-tangata
'o fanongo he tue mo e fakalavetala
'a e manu launoa 'oku toli e kakala
to'ona hono mausa, pea teki e sola 'o kata

Pe'i nonga ho'o fifili ka te u fakamatala
ko homau ve'eve'e tui ki he po tatala
'o hai 'i Fuipa pea mo e 'otu fanga (repeat X 2)
si'i tu'u 'a Tongaleva pea mo e faka-Asava
Ka to 'a e malu pea huni e moana (repeat X 2)

Ko e ha ha'o lau touliki si'i Manavanga
he tala atu 'oku taka mo e fakangalongata'a
Tamaiki, pe'i hu'i 'a e kakala 'o luva
he kei tu'u 'a e Angitoa pea mo e Painimu'a
Tuku a ke ngatuvai 'i he Uafu-ko-Vuna
ke 'ilo'i 'e Tonga ni, ko si'omau tu'unga

Ko e hala kuo papa talu e kilukilua (talu e kilukilua)
Hake 'i Vaha'akolo 'i he ahi mo e vunga
Ka tau tue tue 'oku kei fusi 'a e fuka ('oku kei fusi 'ae fuka)
'Oku kapa-'i-vai 'olive 'o e Hifofua
Pea 'ilo 'e he poto pea moe kaimu'a
Kuila e Lomipeau kuo taha ai 'a e ua